دراجة الحياة

قبل أيام أخذت أول الدروس الخصوصية عشان أتعلم أقود دراجة هوائية ..

اشترينا دراجة هوائية .. واتفقنا اهي تعلمني .. ولمن ناخذ سيارة في المستقبل أنا أعلمها ..

تبادل خبرات الله يسلمكم ..

واحد .. اثنين .. ثلاثة ..  نزلي الكرسي لآخر مستوى ..

واحد .. اثنين .. ثلاثة ..  اقعدي .. حطي ريولج اليمين على الدواسة الأولى ..

وريولج الثانية على الدواسة اليسرى ..

سارون .. مب قادرة .. الدراجة تميل يمين .. ويسار .. أرجوج امسكي الدراجة عشان أقدر أقعد

على الدراجة بتوازن ..

مب قادرة .. والله مب قادرة .. أنا فاشلة .. ومارح أقدر أسوق دراجة أبدا ..

لا .. لازم ما أستسلم .. لازم أحاول .. وما أستسلم من أول محاولة ..

طيب انتي ثبتي على الدراجة بإدينج .. وخليني أقعد صح ..

أو تعرفين شو ؟! اركبي انتي وخليني أركب وراج أسهل شي ..

وربي عارفة إنه خطر .. بس شسوي ما أتخيل نفسي اركب دراجة يا بنت !

اليوم الثاني ..

انتي ما تحسين فيني .. ولا تحسين بالعجز اللي أنا فيه يا سارا ..

كني بيبي .. توني بديت أتعلم الخطوات الأولى في المشي ..

أي مشي الله يخليج ... قولي أتعلم كيف أوقف أول مرة على ريولي .. وأنا متساندة على كتف أمي

سارون وربي صعب .. أنا دبة ومب قادرة .. هالدراجة مب متحملة وزني ولهالسبب مب قادرة حفظ توازني ..

تدخل واحد .. "لا تخلينها تدرب بهالشكل ، لا تخلينها تتوتر واهي تحاول تتوازن واهي واقفة .. لازم تتحرك وانتي تمسكين طرف الدراجة .. لمن تمشي وتحرك العجلات رح تقدر لحظتها تتوازن  .. وأهم شي شوفي يدامك بس لا تحت ولا ورا"

الله يرحم أيام ضحك عيال الفريج والمهندة !!

طيب .. سارون على يساري .. والريال "فاعل الخير" على يميني .. يلا يا بنت دوسي دوسي دوسي .. حركي ريولج

واحد .. اثنين .. ثلاثة .. يااااي سارون .. أنا أتحرك .. أتحرك .. وأحس بالهوا يلعب ف شعري وجسمي وويهي ..

سارون شعور حلو .. أنا أسوق دراجة ولو اني عارفة إن في اثنين يمسكوني .. بس بعده شعور حلو ..

شكرا يا فاعل خير .. لأنك كنت الدفعة الأولى لحياتي .. ألحين أقدر أكمل بروحي مع سارونتي ..

واحد .. اثنين .. ثلاثة .. خطوة خطوتين ثلاثة .. سارون تحذري قاعدة أميل يسار صوبج .. تعالي يميني ..

خطوة خطوتين ثلاثة .. أوووف سارون .. قاعدة أميل صوبج مرة ثانية .. أففف منج بسبة مسكتج للدراجة

صايرة مب قادرة أتوازن ألحين ..

سوري حبيبتي .. مب قاصدة ألومج بس بجد ودي أسوق الدراجة ..

طيب امسكيني بس لا تضغطين بوزنج علي .. أوووف سارا مب قادرة .. ماعرف شو المشكلة ..

اليوم الثالث ..

اليوم بسويها يا سارا ورح تشوفين .. بس بطلب منج طلب ..

امسكيني شوي وخليني بعدها من غير ما تقولين لي.. خليني أكمل بروحي..

أيوة متأكدة ..

واحد .. اثنين .. ثلاثة ... خطوة خطوتين ثلاثة مع سارة .. خطوة من غيرها وطااااااخ ...

أوووه سارون تعورت ..   مب مشكلة نجرب بعد مرة ...

خطوة خطوتين ثلاثة مع سارة ... خطوة خطوتين من غيرها وطاااااااااااخ ...

أووووووج ... يالله خفت من العمود .. انتي كيف تتركيني وأنا قريبة أوصل للعمود ..

خطوة خطوتين ثلاثة مع سارة .. خطوة .. خطوتين .. ثلاثة ... ياي .. ياااااي سارا شفتي قاعدة أسوق بروحي

وطااااااااخ ...

سارون .. شو مشكلتي مب قادرة أثبت وأنا أسوق .. ليش كله أطيح ؟!! أبي أفهم بس

خطوة .. خطوتين ثلاثة مع سارة ... خطوة خطوتين ... لا لاااااا أنا أخاف

شو صاير فيني قبل شوي سويتها ..

خطوة خطوتين ثلاثة .. مع سارة .. خطوة خطوتين ثلاثة .. ياي سارا يااااي ياااااااي أنا أسوق الدراجة بروحي شوفي ...

وطاااااااخ

لا تخافين علي ... ألحين خلص قدرت أتحكم بالدراجة .. خليني أجرب بروحي .. لا تساعديني في البداية .. خليني أبدأ  ...

يلا يلا .. لا تخافين .. أكيد أنا قادرة أسويها وقادرة أسوق دراجة ..

واحد .. اثنين .. ثلاثة .. خطوة خطوتين ثلاثة .. وأنا أسوق الدراجة .. وأمشي بسرعة وأدور حوالين الحلبة ..

ما أشوف ورا .. عيوني بس يدام .. ولقيت نفسي خذت دورة ودورتين وثلاث دورات حوالين الحلبة من غير ما أوقف .. بس بعدها

طااااااخ

هذه حياتي .. طيحات .. ومحاولات .. يأس وخوف .. ومشاعر حلوة وسعيدة ..

هذه حياتي .. كنت محتاجة من يمسكني في البداية .. كنت محتاجة من يشيلني بعد كل طيحة ..

هذه حياتي .. كنت محتاجة إني أحاول مليون مرة وما أيأس ..

ما كنت محتاجة من يساعدني أوقف بتوازن بعد كل اللي مريت فيه ..

كنت محتاجة .. من يخليني أطييير .. أجري وما أشوف ورا .. أحس بالهوا .. أحس بالحياة بداخلي ..

أحس بالتوازن .. بالسعادة والنشوة بكل لحظة ..

أنا عارفة إني طحت كثير .. وتخبطت كثير .. وتعورت كثير .. وفقدت توازني مليون مرة ..

مب مهم .. المهم .. إني ما فقدت الأمل وحاولت .. ومازلت أحاول ..

الحياة مب مجرد تقبل للأشيا الموجودة بين إديك ... الحياة مب مجرد سيارة تعلمتها بسهولة وخلص ..

الحياة إنك تتخلى عن هالسيارة وتتعلم بتصميم وإرادة كيف تقود دراجة .. وتحاول قد ما تقدر إنك تحافظ على توازنك وما تطيح ..

والأهم .. أول قاعدة لقيادة دراجة هوائية ناجحة .. إنك ما تشوف لورا أبدا