مبروك جالك قلق !!

بصراحة ما كنت ناوية أكتب بوست ، بس حبيبتي اضطرت تطلع مشوار ،

وأنا علقت شوي مع شغلة البيت ..


وبعدين حسيت إني أبي أفضفض شوي .. قلت خليني ألجأ للمدونة أحسن بلا هبل :)


بصراحة أنا متوترة وااايد واااااايد .. برشا برشا .. كثير كثير .. هواية هواااااية 

 .. حيل حيييييل

بكرة عندي جلسة .. لأني مقدمة على لجوء .. يعني قرار مصيري جدا ..

أتمنى إنهم يوافقون عليه ، على الأقل الواحد يحس بالإستقرار ..

بعيدا عن الخوف والتربص ..

ما أعرف شو أقول .. بس أنا رسمت خط لحياتي ، أبي أمشي عليها ،،

وأخاف أنصدم بأي شيء يحبطني

أنا مستعدة لكل شي .. وحاطة أسوأ الإحتمالات .. خصوصا من أهلي ..
متأكدة مليون بالمية إنهم يوما ما رح يصحون من سباتهم العميق ..

ورح يعرفون ساعتها إن بنتهم في النصف الثاني من الكرة الأرضية ولازم ترجع ..

قبل لا تسسب لنا فضايح .. وبصمة عار .. ويا خوفي من أهلي لو صحوا من النوم ..

ولهالسبب، ما أقدر أحتمي غير بالحكومة .. غير بالبلد إللي لجأت له ،

وأنا كلي أمل إنهم يساعدوني ..


يمدون لي يدهم عشان أقدر أوقف من جديد .. عشان أعرف أعيش باستقرار ..

عشان أقدر أبني حياة مستقلة ..


وعيلة من اختياري أنا .. مب من اختيار المجتمع والظروف ..


أنا إنسان .. وبحكم إنسانيتي .. من حقي إني أعيش .. من حقي إني أختار ..

من حقي إني أقرر وأعترض ..

دقات قلبي تتسارع .. وحاسة إني بكل لحظة أتنفس بصعوبة ..

الخوف مب من الرفض بس ..

الخوف من الموقف بحد ذاته .. تحس إنك محكوم بالإعدام .. ماعرف ...
اتخذت قرارات كثيرة مصيرية ف آخر 6 شهور من حياتي ،

وباقي آخر خطوة .. باقي يتحدد مصيري

باقي أحس بالأمان بعد ما ذقت طعم الحرية ..

باقي ساعات ... والساعة أحسها واقفة ما تمشي ..

ماعرف كيف رح أقدر أنام الليلة ..

محتاجة معجزة عشان تعدي هال12 ساعة الجاية بسرعة البرق وأرجع

أتنفس من جديد ..